Mbile ga diŋgwa
Diŋgwa! slime nehe èemedzekal aka mbarəŋa dede da. Eviye aŋa inne ma, mbile eŋgirebire a dala ava afa uvah maŋgalaŋa. ezlilivibire aha ŋgaz a muyaŋ a. Aɗak aka kəla uma. Slimeŋa bagərawraw, veɗ ya hundœr aŋa andza aka ya baŋgəla goŋguldok. Aslam ana eɓile ma, yam mewziva dzagwan. Ehebeŋabara aha ara bəza dezl ahaf, abaɗakatalara ohərov mbəzlam-mbəzlam. Mbiyez tetiŋ ma, tacəkwa. Wal tidzeɗa bubəlo, bəzagam titʉwe.Ama Diŋgwa eceŋ ma, ala àmakat gubar aazam naɗ da. Ehelire eligeɗ gaŋa, ezigelire vuto ga mbile nehe. Afalaŋa azləɓalá a mbile ma, ebiləbire allaŋ a, abukwa, azza kudom a fitek aɓal. Ama, kudom adafaŋa ɗœshəɗœshœsh. Aɗaba ambalaŋa andza dal-dal. Mbile ambəɗakava, agəzahagabara naɗ a ara mama, aɓəlakal shek dəraɗ, eslireɗiŋire Diŋgwa afa ahhaŋ. Sludze ya kuɗambar tawa ara kəɗaməsara taɓal, ama aazam mbile da. Tazala Kərisəteŋ zal masara ediŋa, awara kəɗaməsara gaŋa ka akəɗara.
Mbile adda daŋdaŋaŋ, aɗak bidzikədzik aka uma kazaŋ. Mbiyez tigekala aka osloŋa, teceleŋ ara ambal-ambal, tavaba. Wa toksa aslara adza gaŋa. Taslaɗa Diŋgwa a kətah ava taɗaf.
Ezle gaŋa titʉwe naɗ, ama bəzagam taddara limesh ara slime gaŋa. Tazala mbile nehe ya, mbile ga Diŋgwa. Ha tinaŋ ma, mbiyez tasal ana yaŋ ma baŋgəla gula.
Uvah maɓəsa.
Uvah maɓəsa ma etew inde. A viya ava ma, mapəsava ga zal maɓəsa uvah ma ene da. Azaɗ itew dik. Apafaŋavara maslaɗa adak a: eŋgicekeba akwar migecera meŋgire, adzeɗaba mudodos a cici. Azzlam ana azəɗara etew ma: maləgo, azlaba, uvaɗ, odugom, medige. Akahərawa ma, madaval okko a cakwasl meŋgicekebá. Afalaŋa endiviŋá adak maslaɗa ka, uvar atəɗá tam ma, moɓosl hʉlfœ gamnda. Afalaŋa ana uvar atəɗá ma, mezlige aha, ohombulo, mamal iɗel, ara azlam gamnda : izeve, imegwe, ɗəva, aŋgar, mitʉwesh, ayakw. Afalaŋa ana azzlam mizlige andəvá ma, mongurokuləburo aka uvah mɓəsa: muzol. Endəveŋá muzol ma, aŋgalaŋkabara uvah gaŋa. Kəla asle a lugo kahərawa ma, meŋgʉwetelebire gʉzer azzlam gənaw gaŋa. Maŋgalaŋa andəvá, məla arazavaŋ adavabarra ma, zal uvah maɓəsa mawalaya gize, givirek, kətah, aslapayabara aslapa ka maka
Cʉle
Afa madardar ma, məlam mandza gədumma. Cʉle tobuko afa zigəla. Vadago ahala eŋgiva ya, fəca œlfœ ʉwe gata kaɓəsaraba ʉmez ana aftara uvahava. Afalaŋa məla razavaŋ igé guŋgo ma, wal tille ʉwewe.
Abak inne ma, ezlegʉma tawa a slʉze ava ga vadago, vadago azala blama ndekiyaw, ta miteliŋkal ezlegʉma ana tahpaɗ ʉmez ara iɗel. Vadago azara œlfœ agarara ezlegʉma etile.
Gadəra
Viya dəbu ara darəmak obuləmbo ara dzim-dzem obuləmbo maŋgar slalahəkar ga nasara ma, emedzekatal aka mbiyez dede da. A viya nehe ma ,mbiyez tizlege azzlam afətá lele pipile. Ama gadəra mana, midewirek tawa tazəmaba aha cici. Epeva mbiyez a mayahaŋgar ava dik, tasal iɗe ana tazaɗ da. Tahəcaɗ magam ɗeah ,virize toksa taŋga aka Ɓala tideŋafaŋa kakam afa Zigəla ara amətak ana tideɗeya ta maŋganaba gadəra nehe .Ezle musəyoŋ toksa tazam ndəra, tedeŋfoŋuro kakam afa Zigəla. Akabara nehe ma, ŋgəlom aŋa ene da. Afalaŋa aɗəsatalá ŋgar a mbiyez ma, taslakabara cici akahərawa.Tetʉwe ara kwandara, ara dʉdew, kʉɗe-kʉɗe, dʉkʉce, kʉlindzek, ara azzlam ahal. Tigizeŋ ezœzœk ara tuwa.Tahala Zigəla ya, kepé enile pipile ta, nazəmam ma zlamay? Aha ene da .Indze ruma ma Zigəla epilire bangəla uvar a, uɗuva gadəra nehe cici. Alaŋbava ge nehe ka mbiyez tezligeɗ aŋgar ara mitiʉwesh.
Shilmen aga TOT ta ambal a dudo
Shilmen ya Kwatar gizliga
Mbile atal ata aya
Aya ma, zal a wire.
Tahakwa maya, eviyeŋa inne ma, mbile amal iɗel. Aya mawa mazǝmalkala kwedziŋ- kwedziŋ. Abak inne ma, mbile ala ya: "Wa ana mawa mazǝmawkala iɗel gwala hine away?" Mbaca aya ike ekehe, ahala mbileya: "Tandza koŋgov ta kiteŋ iɗe ana azamayakwala iɗel guko hine ma, kakal mbazləwar." Kecikwe ma, mbile egriŋ naka dadaŋa.
Mǝlam esleaba, dew ma, aya uro ille veɗ ebehiŋire aha mbazləwar nehe izze, ka uro ahpaɗ iɗel. Afalaŋa ahpaɗá islé naɗ a ndaɗ ma, aababa a veɗ ava ya akaha ta muro agaba gaŋa cek vaɗ da. Ababa a mbazləwar ava mahǝzlaraŋa ɗeah. Kecikwe ma, akǝsa naɗ a. Ca kǝlakamba apalá mehitembilek a, akababara ekehe. Azzá mehitembelek a mʉkʉleŋá fitek ekeveabara aka kʉliŋdzek. Adatal kama a sla gaŋa yoɗoɗoɗa, adalaŋara ala adǝlaŋ. Kecikwe ma, azləɓal a Aya ikefiŋire afa izine. Zlama, aya azala naɗ ala: "Wa kǝla baaba, wara kaɗay." Kǝlakamba ahalǝkala ya: "Niŋgire ta mazaɗ amay?" Aya ahala: "Nakw wara kecikʉkal zor-zor hine ka da diyaw" Klakamba urokal ma, aya ikefiŋire afa ezine. Ahala aya ya: "Kige ma naka ndar tak may kǝla baaba?" Aya ahalkala: "Wara kazawaba shek hine ana ezine ogǝsufo ndar kaɗay " Afalaŋa kǝlakamba azalaba ezine a shek ava aya ci ma, aya ahala: "Urova aslam gwala ta kige zor-zor kaɗay gata kaslakaba iɗe lele." Zlama kǝlakamba, ara dava gaŋa nehe urova ezine va ya akaha dadaŋa. Afalaŋa odovuró kwish ma, aya ahala: “nakw ege zor-zor kaɗay”. Gǝba igeɗeŋva zor-zor dadaŋa, ezine ahǝdza naɗ mǝraɗ ndar aaslaba cek vaɗ da. Aya uro endire iɗel a, apalafaŋa, ahpaɗ. Adda mahǝkar epilesleŋkaba, opurro a mamba a kǝlakamba ta tala yaŋ ana azǝmakala iɗel ga mbile. Kecikwe ta mbile azləlavakal, adatalavara ŋgar ma, aya azza kwatar a ehiŋze ahala mbile ya: "Cikwe-zla! eziwe guko ya agara ana kaka ma, akǝsakwá eɗiŋa ne." Mbile apasafaŋa kǝlakamba afa ezine, akǝsá naɗ a kwish ma, ahala aya ya: “kandza wir-wir dik, si nakǝsalaŋa kwal a ɗar te." Mahəzlaraŋa ma, azzalaŋa aya, uroratal a ala dǝlav. Azza kǝlakamba, ocǝkulvurro ngar a yam va ehindze. Gǝba ishe yam ɓəzlav. Mbile aŋaganaba naɗ a, aɓǝlakal a hoɗ ava ma, kǝlakamba avnaha yam a, iɗel maplaslá evire mahǝkar dezl. Ama afalaŋa mbile egireleŋa a aya aka aga kǝlakamba kazaŋ ma, yam aslara dorvoɗvoɗ, amal abakala ara iɗel evire waslwaslasl. Mbile apal kǝlakamba, zile uro eŋgicekaba a sla gaŋa, ivebara kʉliŋdzek gaŋa vaɗ, asla. Mbile ahala aya ya, ca nakw ana kazǝmawkala eɗel a . Azza aya, afalaŋ ala slime, aslara naɗ a.
A vuto va , tadalavara ŋgar a dudo ma, aya ahala a dudo ya: "Ŋgureslesla naha ma, ka wa ana mèmbirec kwal vaɗ way? Asal ka mbile ana ozó no, akaslara no ne." Mbile iceŋ kwatar nehe ma, ideŋfaŋa, ahala: "Nakw ana kimbirec naɗ da za?" Aya ʉʉde da. Akamaŋa inʉkwe ma, tazləɓalavara a Mula,. Aya ahala a Mula ya: " ŋgʉleɗiɗe nehe ma, mbire ma anga mbirec kwal vad zla, asal ka mbile ana ozó no, akaslara no ne." Mbile anga ideŋfaŋa, ahala: "Nakw ana kimbrec naɗ da za?" Aya ʉʉde da. Rumo enʉkwe ma, tazləɓalavara a mbəɗa, aya ahala a mbəɗa ya: "Ŋgulaɗaɗa nehe ma, mbire ma anga mbirec kwal vad zla, asal ka mbile ozó no, akaslara no ne." Mbile ideŋfaŋa vaɗ ahala: "Nakw ana kimbirec tal daa za? Afalaŋa nehe mahəzlaraŋa ma , aya aŋganalkal ahala: "Iye, nakw koŋgov ta nembirec kwal ɗar te yaw?" Mbile ahala: "Iye." Aya ahala: " Ahawa ana kakǝsa mbarǝŋa ta kakaɗ, gata kideŋfaŋa kahala mimbirec kwal ahaway?" Mbile ahala: "tandza kèmbe ya membireca no ma, noŋgov ɗar te."
Kecikwe ma, tazləɓal a bba arav eɗiŋa ma, tepeheŋva. Mbile ahala: "Mbirec no zla." Aya ahalkala ya: "Membireca mbiyez ma, tepefiŋirava hoɗ ava ka mazləlavaba afa ambal a. Naka ma, pəslakala membirez a ne”. Afalaŋa kapəslakala ma, keepekirre vaɗ da ne." Mbile ara dava gaŋa apəslakala membirez a dadaŋa. Aya oŋgǝroluro a hoɗ ava a mbile, eŋgewelire annda rac-rac. Aslakabarra ndzœlœhɓer , ahala mbile ya: "Adafakwará guŋgo, ama nakw keeteŋ dzika da." Aya ambəɗakalva uro eŋgewere œgʉver, akkwar, mezivirek ara ambahaf, ʉneliŋa ɓərov dezl. Anga aslara ndzœlœhɓer. Zlama atayaŋva ala: " Bba arav ge dide ya abakana akada, Bba arav ge dide ya abakana akada!" Mbile iceŋ ma, ahala: "Ama zile?" Aya ahaləkala: "Bba arav ge dide eɗiŋa ohuto ma, ahawa abakana ya, afalaŋa akada ma, kala: Bba arav ge dide ya abakana akada, bba arav ge dide ya abakana akada ."
